रुकुम पश्चिममा १३ वर्षीया बालिकाको सामुहिक बलात्कार, तीन जना पक्राउ

रूकुम पश्चिम। रुकुम पश्चिममा १३ वर्षीया बालिकालाई जबरजस्ती करणी (सामुहिक बलात्कार) गरेको आरोपमा तीन जना पक्राउ परेका छन् । तीनै जनालाई प्रहरीले मंगलबार राति पक्राउ गरेको हो ।

पक्राउ पर्नेहरूमा चौरजहारी नगरपालिका-१ पुरानो बजार बस्ने ३७ वर्षीय शिखर भण्डारी, २७ वर्षीय तिलकराज गिरी र २३ वर्षीय सुभाष बन गोसाई रहेका छन्।

चौरजहारी नगरपालिका-१ चौरजहारी बजारस्थित होटलमा बालिकालाई सामुहिक बलात्कार गरेको भन्ने खबरका आधारमा जिल्ला प्रहरी कार्यालय रूकुम पश्चिमबाट खटिएको प्रहरीले उनीहरूलाई पक्राउ गरेको हो।

घटनापछि बालिकालाई स्वास्थ्य परीक्षणका लागि पठाइएको छ। सामुहिक बलात्कार गरेको पक्राउ परेकाहरुविरुद्ध बालिका बलात्कारको कसुरमा अनुसन्धान अघि बढाइने प्रहरीले जनाएको छ ।