बङ्गलादेशको आन्दोलनका कारण ४० मेगावाट विद्युत् खरिद-बिक्री सम्झौता रोकियो
काठमाडौँ । बङ्गलादेशसँग हुने भनिएको ४० मेगावाट विद्युत् खरिद-बिक्री सम्झौता रोकिएको छ ।
बङ्गलादेशमा आरक्षणको विरोधमा भएको हिंसात्मक आन्दोलनका कारण तत्कालका लागि खरिद-बिक्री सम्झौता रोकिएको हो ।
यसअघि यही साउन १३ गतेका लागि सम्झौता समय तोकिएको थियो । बङ्गलादेशबाट र भारतबाट समेत प्रतिनिधि काठमाडौँ आएर नेपालसहित त्रिपक्षीय सम्झौताको समय तय भएको थियो । तर, बङ्गलादेशमा भएको हिंसात्मक आन्दोलनका कारण तत्काललाई रोकिएको हो ।
बंगलादेशमा सरकारी जागिरमा कायम आरक्षण र कोटा प्रणालीको विरोधमा भइरहेको प्रदर्शन चर्किएको छ । विश्वविद्यालयका विद्यार्थीहरूले गरेको प्रदर्शनका क्रममा भएका झडपहरूमा परी बुधबार साँझसम्म ६ जनाको ज्यान गएको छ । दक्षिणी बन्दरगाह सहर चटगाउँमा ३ जना, राजधानी ढाकामा २ जना र उत्तरी सहर रंगपुरमा एक जनाको ज्यान गएको हो ।
बङ्गलादेशले पठाएको पत्रमा अर्को बैठक कहिले बस्ने भन्ने बारे उल्लेख छैन । यद्यपि, देशको आन्तरिक मामिला सुल्झिएपछि बैठक गर्नेगरी प्रतिबद्धता आएको छ । नेपालसँग बिजुली किन्नका लागि बङ्गलादेशको मन्त्रीपरिषद् बैठकले निर्णय नै गरिसकेको छ ।
यस्तै आशयपत्र पनि आइसकेको छ । यसबाहेक बङ्गलादेशले नेपालबाट लैजाने बिजुलीको मूल्य प्रतियुनिट ६ दशमलव ४० सेन्ट हुन आउँछ । यो ८ रुपैयाँ हाराहारी हो ।
