काठमाडौंमा देशभरका शिक्षकहरुको प्रदर्शन

काठमाडौं । विद्यालय शिक्षा ऐन जारी गर्न माग गर्दै काठमाडौमा शिक्षकहरूले र्‍याली निकालेका छन् ।

शिक्षक महासंघको अगुवाइमा काठमाडौंका विभिन्न स्थानबाट र्‍यालीसहित माइतीघर मण्डलामा पुगेर धर्नामा परिणत भएको छ ।

नयाँ चरणको आन्दोलनका लागि देशभरिका शिक्षकहरू बुधबार काठमाडौ आएका हुन् । महासंघ सहअध्यक्ष एवं आन्दोलन परिचालन समितिको संयोजक नानुमाया पराजुलीका अनुसार र्‍यालीमा डेढ लाख शिक्षक कर्मचारी सहभागी हुनेछन् ।

उनले देशभरका शिक्षकहरू काठमाडौं आएको भन्दै आज डेढ लाख शिक्षक कर्मचारीको र्‍याली निस्किएको र भोलि शिक्षक कर्मचारी थप थपिने बताइन् । आन्दोलनलाई शान्तिपूर्ण, अनुशासित र मर्यादित बनाउन ८ सय स्वयंसेवक परिचालन गरेका छौ । प्रदेश प्रदेशबाट पनि १००/१०० जना परिचालन गरिएको छ,’ उनले भनिन् ।