क्याथे प्यासिफिक एयरवेज विमानभित्रै एक यात्रुको मृत्यु
एजेन्सी : जहाजभित्र एक जना यात्रुको मृत्यु भएको छ । बंगलादेशको ढाकाबाट हङकङका लागि उडेको क्याथे प्यासिफिक एयरवेजको विमानमा एक यात्रुको मृत्यु भएको हो ।
बुधबार बिहान बंगलादेशको राजधानी ढाकाबाट हङकङ आउँदै गर्दा उडान सीएक्स ६६२ मा ४७ वर्षीय बंगलादेशी यात्रु बेहोस भएर ढलेको रिपोर्ट प्राप्त भएको हङकङ प्रहरीले जनाएको छ। उनलाई अधिकारीहरूले घटनास्थलमै मृत घोषित गरेका थिए। मृत्युको कारण पत्ता लगाउन पोस्टमार्टम गरिने प्रहरीले जनाएको छ।
विमानस्थल प्राधिकरणका अनुसार स्थानीय समय बिहान २ बजे ढाकाबाट उडेको उक्त जहाज बुधबार बिहान ७ः४९ मा हङकङ अवतरण गरेको थियो। डेढ हप्ताअघि पनि हङकङबाट भारतको मुम्बईका लागि तय भएको क्याथेकै उडानमा बेहोस भएका जर्मन यात्रुको मृत्यु भएको थियो।
७१ वर्षीय ती जर्मन नागरिक जहाजले उडान भर्नुअघि बेहोस भएका थिए। एयर क्रुको प्राथमिक उपचारपछि अस्पताल लगिएका उनलाई मृत घोषित गरिएको थियो।
