गृहका सहसचिवको सरुवाः चार जना बाहिरिए, पाँच जना भित्रिए
चितवन। बिहीबार बसेको मन्त्रिपरिषद्को बैठकले सिडिओसहित गृहका चार सहसचिवहरुको अन्यत्र सरुवा गरेको छ ।
जसमा तीन जिल्लाका सिडिओ हटाइएका छन् । सिन्धुपाल्चोकका सिडिओ भूपेन्द्र थापालाई बागमती प्रदेशको मुख्यमन्त्री कार्यालय अर्घाखाँचीका सिडिओ सूर्यबहादुर खत्रीको श्रम मन्त्रालयमा सरुवा भएको छ । त्यस्तै, सिन्धुलीका सिडिओ भरत खनाललाई महावाणिज्यदूत बनाउने गरी परराष्ट्र मन्त्रालयमा सरुवा गरिएको छ ।
खनालसहित गृहका झक्क प्रसाद आचार्यलाई महावाणिज्यदूत बनाउन परराष्ट्र मन्त्रालयमा सरुवा गरिएको हो । आचार्य गृहको कर्मचारी नीति महाशाखामा कार्यरत छन् ।
राष्ट्रपति कार्यालयका कृष्ण प्रसाद लम्साल, रक्षाका लीला प्रसाद शर्मा, निर्वाचन आयोगका रमेश ढकाल, गण्डकी प्रदेशक ऋषिराम तिवारी, अर्थ मन्त्रालयका डा.टोकराज पाण्डेलाई गृह मन्त्रालयमा सरुवा भएको छ । गृहले काठमाडौंसहित दर्जन जिल्लाका सिडिओको सरुवाको पनि तयारी गरिरहेको छ ।
