प्राधिकरणले पठाएको अनावश्यक कागजात फिर्ता गर्दै लेखा समिति

काठमाडौं । प्रतिनिधिसभा अन्तर्गतको लेखा समितिले नेपाल विद्युत् प्राधिकरणले पठाएको अनावश्यक कागजजात फिर्ता गर्ने भएको छ ।
टाइम अफ डे (टीओडी) डाटा, मनोज मिश्र समितिको प्रतिवेदन र सञ्चालक समितिको निर्णय कार्यान्वयनको अवस्थाको प्रतिवेदन मात्रै मागेकोमा प्राधिकरणले १ लाख पेजभन्दा बढी अनावश्यक कागजात पठाएको भन्दै समितिले फिर्ता गर्न लागेको हो ।
सार्वजनिक लेखा समितिका सभापति ऋषिकेश दाहालले प्राधिकरणले पठाएको प्रतिवेदन समितिमा अध्ययन गर्न लगाएको र अनावश्यक कागजात फिर्ता गर्ने बताए । उनले समिति सबै कागजात राख्नका लागि प्राधिकरणको ढड्डा राख्ने ठाउँ नभएको समेत प्रतिक्रिया दिए ।
यसअघि समितिको बैठकले सबै उद्योगीको प्रोफाइलसहितको टीओडी डाटा मागेको थियो । तर, बिहीबार प्राधिकरणका कार्यकारी निर्देशक कुलमान घिसिङले ३० पोका कागजसहितको एक ट्रक कागज सार्वजनिक लेखा समितिमा पठाएका थिए ।
जसमा टीओडी डाटा एक पोका, लोड प्रोफाइलसहितको टीओडी डाटा तीन पोका, लगसिट २४ पोका, मनोज मिश्र र भक्तबहादुर पुनको प्रतिवेदन, अदालतको फैसला एक पोका र २०७२ माघदेखि २०७५ वैशाखसम्मको महसुल सम्बन्धी बिल रहेको छ ।