नेपाल छिर्न खोजेका बंगलादेशी नागरिकहरुलाई फर्काइए
चितवन। मोरङको रानी नाकाहुँदै नेपाल छिर्न खोज्ने एक बंगलादेशी नागरिकलाई नेपाली सुरक्षाकर्मीले भारत तिरै फर्काइदिएका छन् । नेपाल प्रहरी र सशस्त्र प्रहरी बल (एपीएफ)को संयुक्त टोलीले सीमा क्षेत्रमा चेकजाँच गर्ने क्रममा बंगलादेशी नागरिक ४६ वर्षीय उत्तम सर्कारलाई मंगलबार दिउँसो नेपाल प्रवेशमा रोक लगाउदै भारत फिर्ता पठाएको हो ।
कोशी प्रदेश प्रहरी कार्यालयका एक अधिकृतका अनुसार ती बंगालदेशी नागरिक भारतको जोगवनी हुँदै रानी नाकाबाट नेपाल छिर्ने प्रयासमा थिए । त्यसको सुइको पाएपछि प्रहरीले ४६ वर्षीय उत्तम सर्कारलाई प्रवेशमा रोक लगाएको हो ।
बंगलादेशमा राजनीतिक संकट चुलिएपछि प्रधानमन्त्री शेख हसिनाले सोमबार पदबाट राजीनामा दिँदै देश छाडेर भारत पुगेकी छन् । लगत्तै बंगलादेशको सेनाले छिट्टै अन्तरिम सरकार गठन गर्ने घोषणा गरिसकेको छ । बंगलादेशको विपक्षी दल बंगलादेश नेशनल पार्टी (बीएनपी) की नेतृ खालिदा जिया पनि जेलमुक्त भएकी छिन् । ७८ वर्षीया जियालाई हसिनाको शासनकालमा सन् २०१८ मा भ्रष्टाचारको आरोपमा १७ वर्षको कारागार सजाय सुनाइएको थियो ।
बंगलादेशको राजनीतिक घटनाक्रमपछि नेपाल सरकारले पनि सीमा क्षेत्रबाट गैरकानुनी घुसपैठसम्मकाे असर नेपालसम्मै देखिने आकलनसहित सीमा क्षेत्रको सुरक्षा व्यवस्था कडा पार्न सबै सुरक्षा निकायलाई सोमबार नै निर्देशन दिएको थियो ।
गृह मन्त्रालयको निर्देशनपछि नेपाल प्रहरी र सशस्त्र प्रहरीले सीमा क्षेत्रमा सुरक्षा जाँचमा कडाई गर्नुका साथै आवागमनमा निगरानीदेखि सम्भावित घुसपैठ रोक्न नियमितबाहेक अतिरिक्त सुरक्षा जनशक्तिसमेत परिचालन गरिसकेका छन् । मंगलबार पनि प्रहरी र सशस्त्रको संयुक्त जाँचका क्रममा बंगाली नागरिक सर्कार गैरकानुनी रुपमा नेपाल छिर्न खाजेको पाइएको थियो ।
नाकामा चेकजाँच गर्ने क्रममा उत्तमको साथबाट बंगलादेशको नागरिक रहेको परिचय पत्र भेटिएपछि फिर्ता पठाएको उनले जानकारी दिए ।
कार्कीका अनुसार प्रहरीले नाकामा उच्च सतर्कता अपनाएको छ । बंगलादेशमा आरक्षण विरोधी आन्दोलन उत्कर्षमा पुगेपछि सोमबार प्रधानमन्त्री शेख हसिनाले राजीनामा दिएर देश छाडेकी थिइन् ।
