नारायणी नदी किनारमा ‘मर्निङवाक’ गर्दै गर्दा बाघको आक्रमणबाट एक जना घाइते
चितवन। चितवनको मुख्य बजार क्षेत्र नारायणगढ नजिकै रहेको नारायणी किनारमा आज बिहान बाघको आक्रमणबाट एक जना घाइते भएका छन् ।
चितवन भरतपुर महानगरपालिका–१ स्थित नारायणी नदी किनारमा ‘मर्निङवाक’ गर्न निस्किएका एक व्यक्ति बाघको आक्रमणबाट घाइते भएका हुन्। बिहान करिब सवा ५ बजे पैदल हिँडेका भरतपुर–२ बेलटाँडी बस्ने ६० वर्षीय पशुपति श्रेष्ठलाई एक्कासी बाघले आक्रमण गरेको चितवनका प्रमुख जिल्ला अधिकारी इन्द्रदेव यादवले जानकारी दिए ।
बाघको आक्रमणबाट घाइते भएको श्रेष्ठको चितवन मेडिकल कलेजमा उपचार भइरहेको छ । उनको मुख र हातमा चोट लागेको छ । स्वास्थ्य अवस्था मध्यम रहेको अस्पतालले जानकारी दिएको छ । बाघको खोजी तथा नियन्त्रणको लागि जिल्ला वन कार्यालयबाट कर्मचारीहरू खटिएका छन् ।
बाघ खोजी तथा नियन्त्रणमाको लागि जिल्ला वन कार्यालय भरतपुरको टोली र प्रहरी परिचालन गरिएको जिल्ला प्रहरी कार्यालय चितवनका प्रहरी प्रवक्ता डीएसपी भेषराज रिजालले जानकारी दिए । अक्रमण गरेको बाघ नारायणी नदी किनारा नजिकै झाडिमा लुकेको र खोजिका लागि जिल्ला बन कार्यालयबाट हात्ती सहित कर्मचारी खटिएका छन् । झाडिमा लुकेको अनुमान गरिएकाे बाघ अहिलेसम्म फेला भने परेकाे छैन ।
चितवन राष्ट्रिय निकुञ्जबाट हात्ती ल्याएर बाघलाई नियन्त्रणमा लिने तयारी गरिएको छ । निकुञ्ज र राष्ट्रिय प्रकृति संरक्षण कोषका प्राविधिकहरुलाई बाघ नियन्त्रणका लागि डिभिजन बन कार्यालयले अनुरोध गरेको छ ।
