चट्याङले एमप्लिफायर बिग्रिंदा भरतपुर अस्पतालमा एमआरआई सेवा बन्द
चितवन । चितवनको भरतपुर-१० मा रहेको भरतपुर अस्पतालमा केही साता अगाडि जोडिएको एमआरआई मेसिनको एमप्लिफायर चट्याङ्का कारण बिग्रिंदा सेवा बन्द भएको छ ।
अस्पतालका मेडिकल सुपरिटेण्डेन्ट डा. कृष्णप्रसाद पौडेलले दिएको जानकारी अनुसार १६ गते परेको चट्याङ्गले मेसिनमा जडान गरिएको एमप्लिफायर बिग्रिन गएको थियो ।
अर्थिङ्ग भए पनि मेसिनमा चट्याङ्गले क्षति गरेको र उक्त चट्याङले बिग्रिएको सामान जर्मनीबाट मगाउनु पर्ने अस्पतालका रेडियोलोजी विभागका प्रमुख डा. केशव पौडेलले जानकारी दिनु भयो। ‘जर्मनीबाट सामानको अर्डर भैसकेको भन्ने सुनेको छु, केही दिनमा नै नेपाल आउने र जडान गर्ने भन्ने सूचना छ,’ डा.पौडेलले भने, ‘चाँडै नै सेवा पुनः सुचारु हुने विश्वासमा छौं ।’
भरतपुर अस्पतालमा एमआरआई सेवा ४ दिनदेखि बन्द हुँदा बिरामीलाई समस्या पर्न थालेको छ । दैनिक १४/१५ जना बिरामीको एमआरआई हुँदै आएको डा. पौडेलले बताए ।
जर्मनीमा बनेको सिमेन्स कम्पनीको ‘थ्री टेस्ला ६४ च्यानल’को सो मेसिन गत जेठ २३ गते अस्पतालमा ल्याइएको थियो ।
एमआरआई कस्तो मेडिकल उपकरण हो ?
एमआरआई भनेको चुम्बकीय शक्ति प्रयोग गरेर कम्प्युटरको सहायताले शरीरभित्रको अवस्थालाई जस्ताको त्यस्तै तस्वीरमा खिचेर देखाउने मेडिकल उपकरण हो । एमआरआईको पूरा रुप म्याग्नेटिक रेजोनेन्स इमेजिङ हो ।
कस्तो अवस्थामा प्रयोग हुन्छ ?
शरीरको टाउकोदेखि पैतालासम्मको भागको समस्याको पहिचान गर्न र उपचारमा निगरानी एमआरआईको प्रयोग हुन्छ ।
– मेरुदण्ड, हाडजोर्नी र मुटुसँग सम्बन्धित रोग स्पष्ट रुपमा पहिचान गर्न
– स्तन क्यान्सरको जोखिम पत्ता लगाउन
– मस्तिष्क समस्याहरू (पक्षघातपछि रगत नपुगेर क्षति पुगेको स्थानहरु हेर्न, छारेरोग, लगातार टाउको दुखाइ कारण) पत्ता लगाउन
– पाठेघर र कलेजोको क्यान्सर निदान गर्न
– बाँझोपन उपचार गराइरहेका महिलाको गर्भाशय असामान्यता पत्ता लगाउन
– एन्डोमेटियोसिसका महिलामा दुखाइको कारण मूल्यांकन गर्न
– शरीरका विभिन्न भागमा अल्सर, ट्युमर वा अन्य रोगको निदान गर्न
एमआरआईको परीक्षण प्राविधिकको निगरानीमा हुन्छ । जसलाई पछि रेडियोलोजिस्टले रिपोर्टिङ गर्छन् ।
