आईसीसी टी२० विश्वकपमा दक्षिण अफ्रिकाले नेपाललाई १ रनले पराजित
११६ रनको लक्ष्य पछ्याएको नेपालले ७ विकेटको क्षतिमा ११४ रन मात्र बनाउन सक्यो
काठमाडौँ । आईसीसी टी२० विश्वकपमा नेपाल दक्षिण अफ्रिकासँग १ रनले पराजित भएको छ। यससँगै नेपाल विश्वकपबाट बाहिरिएको छ।
दक्षिण अफ्रिकाले दिएको ११६ रनको लक्ष्य पछ्याएको नेपालले ७ विकेटको क्षतिमा ११४ रन मात्र बनाउन सक्यो।
नेपालका आशिफ शेखले ४९ बलमा सर्वाधिक ४२ रनको योगदान दिए ।
नेपालका अनिल साहले २७ रन बनाए। कुशल भुर्तेल १३ रनमा आउट भए। सोमपाल कामीले ८ तथा गुल्शन झाले ६ रन बनाए तर कप्तान रोहित पौडेल शून्यमा आउट भए।
वेस्टइन्डिजको सेन्टभिसेन्टमा टस हारेर पहिले ब्याटिङको निम्तो पाएको दक्षिण अफ्रिकाले निर्धारित २० ओभरमा ७ विकेट गुमाउँदै ११५ रन बनाएको थियो।
ओपनर कुशल भुर्तेल २१ बलमा १३ रन बनाइ आउट भए । नेपालले ७ ओभरमा बिना क्षति ३४ रन बनाएपछि आठौं ओभरमा कुशल अनावश्यक रिभर्स स्वीप हान्न खोज्दा बल प्याडमा लागेर ताब्राइज साम्सीको बलमा बोल्ड भए । भुर्तेलले समान १ चौका र छक्का प्रहार गरेका थिए ।
नियमित स्पिनर केशव महाराजको स्थानमा खेलिरहेका साम्सीले अर्को बलमा कप्तान रोहित पौडेललाई पनि बोल्ड गरे । पहिलो बलमै ड्राइभ गरेका साम्सीको टर्न बलमा बिट भएर बोल्ड भए ।
दक्षिण अफ्रिकाको यो लगातार चौथो विजय हो । पहिलो ३ खेल जितेर सुपर ‘एट’ मा पुगिसकेको दक्षिण अफ्रिकाले नेपालविरुद्ध पूर्ण टोली उतारेको थियो । नेपाल यस हारपछि समूहचरणबाटै बाहिरिएको छ । नेपालले बंगलादेशसँग आइतबार समूहचरणको अन्तिम खेल खेल्ने छ ।
दक्षिण अफ्रिकाका रीजा हेन्ड्रिक्सले सर्वाधिक ४३ रन बनाए। उनले ४९ बलमा ५ चौका र १ छक्का प्रहार गरे। ट्रिस्टन स्टब्सले २७ तथा मार्करमले १५ रन बनाए।
नेपालका लागि कुशल भूर्तेलले ४ ओभरमा १९ रन दिदै ४ विकेट लिए। दीपेन्द्रसिंह ऐरीले ३ विकेट लिए। उनले ४ ओभरमा २१ रन खर्चिए।
