दाङमा दश दिनअघि मात्र सम्बन्ध बिच्छेद भएको महिलाको श्रीमानद्वारा हत्या
काठमाडौं । दश दिनअघि मात्र सम्बन्ध विच्छेद गरिएकी एक महिलाको श्रीमानद्वारा नै हत्या भएको छ ।
दाङ तुलसीपुर उपमहानगरपालिका–६ राप्ती टोलमा बस्ने ३१ वर्षीया टिका रावतको हत्यामा संलग्न उनका श्रीमान ३६ वर्षीय शालिकराम रावतलाई प्रहरीले पक्राउ गरेको हो ।
इलाका प्रहरी कार्यालय तुलसीपुर प्रमुख डिएसपी ठाकुरप्रसाद पोखरेलका अनुसार नेपाली सेनाका अमलदार रहेका उनी ज्वालादल गण बारामा कार्यरत छन् । उनले शुक्रबार बिहान ८ बजेर ४० मिनेट जाँदा टीकाको हत्या गरेको खुलेको छ ।
शुक्रबार बिहान ८ बजेतिर टीका बस्ने कोठामा पुगेका शालिकरामले टीकालाई अर्कै पुरुषसँग भेटेपछि खुकुरी प्रहार गरेर हत्या गरेको प्रहरीको प्रारम्भिक अनुसन्धानमा खुलेको छ ।
शालिकरामले पहिले ती पुरुषमाथि अन्धाधुन्ध खुकुरी प्रहार गरेपछि पुरुष त्यहाँबाट भागेर ज्यान बचाएका थिए । उनीसँगै टीका पनि भागेर छिमेकीको घरमा लुकेको अवस्थामा शालिकरामले भेटाएपछि टीकाको हत्या गरेको प्रहरीको प्रारम्भिक अनुसन्धानमा खुलेको छ ।
टीकासँगै कोठामा भेटिएका २९ वर्षीय आर्यन थापा अछाम कमल बजार नगरपालिका ४ घर भइ हाल तुलसीपुरको १९ नम्बर बाहिनीमा कार्यरत जवान भएको बताइएको छ । उनीमाथि खुकुरी प्रहार हुँदा हात, टाउँको र छातिमा चोट लागेको पनि प्रहरीले जनाएको छ । उनको प्रादेशिक अस्पताल तुलसीपुरमा उपचार भइरहेको पनि प्रहरीले जनाएको छ ।
टीकाको हत्या गरेर खुकुरीसहित हिँडीरहेको अवस्थामा प्रहरीले उनलाई पक्राउ गरेको र आफुले हत्या गरेको स्वीकारेको प्रहरीले जनाएको छ । टीका र शालिकरामबाट जन्मिएका एक छोरा समेत रहेको प्रहरीले जनाएको छ ।
