उपेन्द्र यादव र दिपक कार्कीले दिए राजीनामा, सरकारबाट बाहिरियो जसपा
काठमाडौं । उपप्रधान एवम् स्वास्थ्य तथा जनसंख्या मन्त्री उपेन्द्र यादवले पदबाट राजीनामा दिएका छन् । उनले सोमबार बिहान प्रधानमन्त्रीलाई सम्बोधन गर्दै पत्र पठाएका हुन् ।
यस्तै वन तथा वातावरण राज्य मन्त्री दीपक कार्कीले पनि राजीनामा दिएका छन् । उनीहरु दुबै जनाले राजीनामा दिएको उपेन्द्रका स्वकीय सचिव महेश चौरसियाले जानकारी दिए ।
सरकारमा सहभागी जसपा नेपाललाई विभाजन गर्दै अशोक राईले अघिल्लो हप्ता जसपा गठन गरेका थिए । आफ्नो दल विभाजित भए पनि यादवले सुरुवातमा सरकारमा सहभागी हुने निर्णय लिएका थिए । तर प्रधानमन्त्रीले नै सरकारबाट हटाउन चाहेको बुझेपछि उनले नयाँ निर्णय लिएका हुन् ।
राजीनामापत्रमा यादवले ‘वर्तमान विकसित राजनीतिक परिस्थितिमा सरकारमै रहेर सहकार्यलाई निरन्तरता दिन नसकिने भएको हुँदा’ राजीनामादिन चाहेको उल्लेख छ ।
सरकारमा यादव उपप्रधान तथा स्वास्थ्य मन्त्री र कार्की वन तथा वातावरण राज्यमन्त्री थिए ।
मधेस प्रदेशमा नेकपा एमाले र माओवादी केन्द्रले जसपा नेपाल नेतृत्वको सरकारलाई दिएको समर्थन फिर्ता लिएको भोलिपल्टै केन्द्रमा यादवले राजीनामा दिएका हुन् । यससँगै प्रधानमन्त्री पुष्पकमल दाहाल प्रचण्ड नेतृत्वको सरकारबाट जसपा नेपाल बाहिरिएको छ ।
