पर्यटन तथा नागरिक उड्डयनमन्त्रीले मागे निगमका अध्यक्षसँग जवाफ

काठमाडौं । पर्यटन तथा नागरिक उड्डयनमन्त्री सुदन किरातीले नेपाल वायु सेवा निगमको जहाज एकपछि अर्को गर्दै ग्राउण्डेड भएपछि व्यवस्थापकसँग जवाफ माग गरेका छन् ।

पर्यटन मन्त्री किरातीले सोमबार निगमका कार्यकारी अध्यक्ष युवराज अधिकारी र सञ्चालक समितिका सदस्यहरुलाई बोलाएर जहाज ग्राउण्डेड हुनुको कारणबारे जवाफ मागेका हुन् ।

अन्तर्राष्ट्रिय उडानका लागि निगमसँग ४ वटा जहाज छ । तर, एउटा वाइड बडी जहाज करिब २ सातादेखि ग्राउण्डेड छ भने तीन महिनासम्म ग्राउण्डेड एउटा न्यारोबडी जहाज इजरायलमा भाडाको इन्जिन राखेर ल्याइएको दुई सातामा दोस्रोपटक ग्राउण्डेड हुन पुगेको छ ।

जसका कारण निगमले कतिपय गन्तव्यका उडान रद्द गर्नुपरिरहेको छ । यसबाट उसले दैनिक ३ करोड रुपैयाँभन्दा बढी आम्दानी गुमाइरहेको छ ।