८ आश्विन २०८०, सोमबार | Email:- info@nepalrastrakhabar.com | marketing@nepalrastrakhabar.com
९२ दिनमा १४ हिमाल आरोहण गरेर क्रिस्टिन र तेन्जेनको कीर्तिमान - Nepal Rastra Khabar
Banner NewsBanner news (with photo)ताजा समाचारदेशपर्यटनमनोरञ्जनमुख्य समाचारसफलताको कथा

९२ दिनमा १४ हिमाल आरोहण गरेर क्रिस्टिन र तेन्जेनको कीर्तिमान

नेपाली पथप्रदर्शक तेन्जेन शेर्पा (लामा) र नर्वेकी महिला आरोही क्रिस्टिन हेरिलाले बिहीबार हिमाल आरोहणमा कीर्तिमान बनाएका छन् ।

९२ दिनमा विश्वका आठ हजार मिटरभन्दा अग्ला १४ हिमालको सफल आरोहण गरेर उनीहरूले कीर्तिमान कायम गरेका हुन् ।

बिहीबार बिहान पाकिस्तानमा रहेको विश्वकै दोस्रो अग्लो केटु (८,६११ मिटर) हिमालआरोहण सम्पन्न गरेसँगै क्रिस्टिन र तेन्जेनको नाममा रेकर्ड बनेको हो । दुवैले बिहान ११ः४० बजे केटु शिखर चुमेको सेभेन समिट ट्रेक्सका अध्यक्ष मिग्मा शेर्पाले बताए । यससँगै सबैभन्दा छोटो अवधिमा १४ हिमाल आरोहण गर्ने निम्स दाइ (निर्मल पुर्जा)को रेकर्ड तोडिएको छ । पुर्जाले ६ महिना ६ दिनमै १४ वटै हिमाल आरोहण गरेर विश्व कीर्तिमान राखेका थिए । गत वर्ष उनको आरोहण टोलीमाथि बनाइएको वृत्तचित्रले विश्वभर चर्चा कमाएको थियो ।

विश्वमा आठ हजार मिटरभन्दा अग्ला हिमाल १४ वटा छन् । जसमध्ये सर्वोच्च शिखर सगरमाथासहित आठवटा हिमाल नेपालमै छन् । विश्वको दोस्रो अग्लो केटुसहित पाँचवटा हिमाल पाकिस्तान र एउटा चीन (तिब्बत)मा छ । विगततिर फर्किंदा रेनहोल्ड मेस्नरले १६ वर्ष लगाएर १४ वटा हिमालको चुचुरो चुमेका थिए । क्रिस्टिन र तेन्जेनले तीन महिनामै विश्वका अग्ला चुचुरा चुमेर संसारलाई चकित पारेको सेभेन समिटका अध्यक्ष शेर्पाले बताए । ‘एउटा दृढ संकल्पको विजय भएको छ,’ मिग्माले भने ।

नर्वेजियन क्रिस्टिन हेरिलाको ‘सी मुभ्स माउन्टेन’ अभियानलाई नेपाली गाइड तेन्जेन शेर्पाले सुरुदेखि नै साथ दिएका थिए । क्रिस्टिनले १४ वटै हिमाल तेन्जेनसँगै आरोहण गरेकी हुन् । यसअघि एक वर्ष पाँच दिनमा १४ अग्ला हिमालआरोहण गरेर क्रिस्टिनले पहिलो महिला आरोहीको कीर्तिमान बनाएकी थिइन् । क्रिस्टिनको हिमाल आरोहणको व्यवस्थापन नेपाली कम्पनी सेभेन समिट ट्रेक्सले गरेको हो ।

२६ अप्रिल ०२३ मा क्रिस्टिन र तेन्जेनले चीन (तिब्बत)मा रहेको सिसपांग्मा (८,०२७ मिटर) हिमालआरोहण गरेर अभियान सुरु गरेका थिए । यो आठ हजार मिटर अग्ला १४ वटा हिमालमध्ये सबैभन्दा सानो हो । उनीहरूले ३ मेमा चोयु हिमाल (८,१८८ मिटर), १३ मेमा मकालु (८,४८५ मिटर), १८ मेमा विश्वकै तेस्रो अग्लो कञ्चनजंघा (८,५८६ मिटर), २३ मेमा सर्वोच्च शिखर सगरमाथा (८,८४८.८६ मिटर), २३ मेमै विश्वकै चौथो अग्लो हिमाल ल्होत्से (८,५१६ मिटर), २९ मेमा धवलागिरि (८,१६७ मिटर) हिमालको चुचुरो चुमेको सेभेन समिट ट्रेक्सले जनाएको छ ।

यस्तै, ५ जुनमा क्रिस्टिन र तेन्जेनले अन्नपूर्ण फस्र्ट (८,०९१ मिटर) हिमालको सफल आरोहण गरेका थिए भने १० जुनमा मनास्लु (८,१६३ मिटर), २६ जुनमा पाकिस्तानमा रहेको नङ्गा पर्वत (८,१२५ मिटर), १५ जुलाईमा पाकिस्तानकै ग्यासरब्रम–टु (८,०३४ मिटर), १८ जुलाईमा पाकिस्तानमै रहेको ग्यासरब्रम–वान (८,०८० मिटर), २३ जुलाईमा पाकिस्तानमै रहेको ब्रोडपिक (८,०५१ मिटर) र २७ जुलाईमा पाकिस्तानमै रहेको केटु हिमाल (८,६११ मिटर) सफल आरोहण गरेका हुन् ।

Nepal Rastra Khabar

Nepal Rastra Khabar is a bonafide online news portal of Nepal featuring local as well as global news on finance, culture, politics, business trends, sports, and much more.

Related Articles

Leave a Reply

Your email address will not be published. Required fields are marked *

Check Also
Close
Back to top button

Adblock Detected

Please off your Ad Blocker