सिरहामा बोरामा हालेर गाडिएको अवस्थामा शव भेटियो
चितवन। सिरहामा खोला किनारमा बोरामा गाडिएको अवस्थामा एक जनाको शव भेटिएको छ । गोलबजार नगरपालिका–९ गोविन्दपुरस्थित घुर्मी खोला किनारमा बोराभित्र राखेर गाडिएको अवस्था आज बिहान १० बजेतिर शव फेला परेको हो ।
मिर्चैयाका डीएसपी पञ्चकुमार बाखुले शव कुहिसकेको अवस्थामा रहेकाले कसको हो भन्ने पहिचान गर्न कठिन भएको बताए ।
उनका अनुसार मंगलबार बिहान १० बजेतिर गोठालोहरूले दुर्गन्ध फैलिएको र त्यहाँ हाड हेरेपछि प्रहरीलाई खबर गरेका थिए ।
सब अत्यन्त कुहिसकेको अवस्थामा रहेको बताए ।
सोही गाउँकी १३ वर्षीया बालिका गुल्सना खातुन गत फागुन २९ गतेदेखि हराइरहेकी छिन् ।
गाउँकै सामुदायिक विद्यालयमा कक्षा ४ मा अध्ययनरत बालिका खातुन बिहान ९ बजे घरबाट निस्केकी थिइन् । तर, फर्केर नआएपछि आमा जाहेदा खातुनले चैत १ गतेमा प्रहरीमा निवेदन दिएकी थिइन् ।
मंगलबार भेटिएको शव उनकै हुनसक्ने आशंका स्थानीयको छ । शव परीक्षणका लागि अस्पताल पठाउने तयारी भइरहेको र घटना सम्बन्धमा थप अनुसन्धान भइरहेको डीएसपीले बताए ।
घटनास्थलमा प्रहरी टोली पुगिसकेको र घटनाबारे अनुसन्धान भइरहेको उनले बताए ।
प्रहरीका अनुसार केही दिनअघिदेखि गाउँकी १३ वर्षीया बालिका गुल्सना खातुन हराइरहेकी छन् । उनको खोजी कार्य भइरहे पनि अहिलेसम्म फेला पर्न नसकेको प्रहरीले जनाएको छ ।
