दरबारमार्गमा २५ तले अन्नपूर्ण स्क्वायरको प्रारम्भ, सुन्दर नेपालको प्रतीक हुने अध्यक्ष गुरूङको दाबी
काठमाडौं । दरबारमार्गमा २५ तलासहितको अन्नपूर्ण स्क्वायर निर्माण सुरु भएको छ । उक्त “अन्नपूर्ण स्क्वायर” लिटिल एन्जल्स, भाटभटेनी समूह र अन्नपूर्ण समूहले संयुक्त रूपमा निर्माण थालेका हुन्।
अहिले बन्न लागेको उक्त निर्माण स्थलमा यसअघि होटल अन्नपूर्ण रहेको थियो।
सोमबार एक विशेष समारोहका बीच भूमि पुजा सम्पन्न गर्दै कम्पनीका अध्यक्ष मीनबहादुर गुरुङले सुन्दर नेपालको सुन्दरताको प्रतीकका रूपमा निर्माण थालिएको बताउनु भयो।
मीनबहादुर गुरुङ भाटभटेनी सुपरमार्केटका अध्यक्ष पनि हुन् । “भारतको आर्किटेक्चर कम्पनीले यसको डिजाइन गरेको छ,” उनले भने, “दुई चरणमा काम सम्पन्न गर्ने योजना बनाएका छौँ । २०८५ वैशाख १ गतेदेखि होटल सञ्चालनमा ल्याउने लक्ष्य रहेको छ ।”
अन्नपूर्ण स्क्वायर होटल ९ लाख स्क्वायर फिट क्षेत्रफलमा रहनेछ भने ४० कोठा अपार्टमेन्ट हुनेछ र २५ तलाको हुनेछ। भाटभटेनीको एउटा स्टोर पनि त्यहाँ रहनेछ बताइएको छ।
कम्तिमा पनि ६ अर्ब रूपैयाँको लगानीमा निर्माण थालिएको होटलसँगै क्यासिनो पनि सञ्चालनमा आउनेछ ।
“ अहिले पुरानो संरचना भत्काइरहेका छौँ, सुन्दर नेपालको सुन्दरताको प्रतीक निर्माण गर्ने लक्ष्य राखेर काम अघि बढाएका छौँ,” अध्यक्ष गुरूङले भने, “२०८५ वैशाख १ गतेबाट होटल सञ्चालनमा ल्याउने तयारी गरिएको छ । नगरपालिकाले जति छिटो अनुमति दिन्छ हामीले त्यति नै छिटो निर्माण पनि थाल्नेछौँ ।”
तीन सय भन्दा बडी कोठा रहने उक्त होटल नेपालकै गौरव गर्न सक्ने संरचनाको रूपमा निर्माण गर्न लागिएको भए पनि मूल्य भने ‘रिजनेवल’ हुने उनले बताए ।
होटल र आर्केड निर्माण हुनेछ जुन एक आपसमा अलग्गै हुनेछ। बैंक्वेट हल २५ सय, २ हजार र १५ सय क्षमताका तीनवटा हुनेछन जुन धेरै राम्रा र मूल्य रिजनेबल हुने दाबी गरिएको छ।
आर्केड डेढ वर्षमा र होटल साढे दुई वर्षमा निर्माण सकिने अनुमान गरिएको अध्यक्ष मीनबहादुर गुरुङले बताए।
“नेपालमा पनि केही हुन सक्छ भन्ने सन्देश जाओस् भनेर निर्माण थालेका हौँ,” उनले भने, “तीनवटा समूह मिलेर निर्माण थालेका हौँ । व्यवस्थापन आईटीसीको वेलकम ब्रान्डलाई दिएका छौँ । सबै व्यवस्थापन उहाँहरुले हेर्नुहुनेछ ।” गुरूङलाई बढी कर तिर्नेको सूचीमा राख्दै सरकारले शनिबार विशेष सम्मान पनि गरेको थियो ।
“हाम्रा (भाटभटेनी) दुईवटा लक्ष्य छन्, एउटा हो– रोजगारी सिर्जना गर्दै जाने र राज्य कोषमा अत्यधिक भन्दा अत्याधिक कर तिर्दै जाने ।” त्यसपछि मात्रै मुलुक समृद्ध बन्ने उनको धारणा रहेको छ। “राजश्व चाहिँ देशमा जरुरी छ । सबै व्यवसायी दत्तचित्त भएर लागे भने सम्भव पनि छ,” उनले भने, “देश बनेन भने हामी बन्न सक्दैनौँ । देश सम्पन्न भएन भने हामी सम्पन्न हुँदैनौँ । देश सम्पन्न हुनका लागि राजश्व बढ्नैपर्छ ।”
आर्केड डेढ वर्षमा र होटल साढे दुई वर्षमा निर्माण सकिने अनुमान गरिएको अध्यक्ष मीनबहादुर गुरुङले बताए।
